Eleccions: participar o pas?

A cada eleccion er’occitanisme politic que’s desvelha e qu’ensaja de mautà’s. Un occitanisme politic shens guaire de poder suras realitats de noste e sura nosta situacion de dependéncia, un occitanisme politic qui’s perpausa sovent com simple arrelais deth moviment de defensa dera lenga e dera cultura. E malurosament non pòt pas èster  miélher qu’aquerò, per manca de reflexion estrategica e de projècte occitanista de societat vertadèr.                                                                                                                                Atau a cada eleccion que’s da er’illusion d’existir. Lavetz era preséncia enas eleccions qu’ensaja d’estujar era misèria ideologica e politica. Aquesta qu’apareish un aute còp de mes autanlèu eths moments prumèrs dera campanha electorau, a travèrs presas de posicions e professions de fe.

De notar per exemple duas presas de posicions, ua deth P.N.O. e ua auta deth P.O.C. de Provença. En comunicat deth 25 de mai, eth P.N.O. que sosten « totes los candidats e las candidatas a las eleccions legislativas qu’an l’aval del Partit Occitan ». Qu’ei ua posicion qui pausa questions. Lavetz qu’am eth sosten d’un grop politic qui defen er’existéncia dera nacion occitana a un grop qui la desconeish e sordeish qui’n combat er’arreconeishença. Duas posicions antagonicas, e un abandon peth P.N.O. d’ua posicion ideologica fondamentau deth combat noste. Aquerò non pòt pas servir ara clarificacion peth moviment occitanista. Que mes eth P.O.C. que’s ditz der’esquèrra ecologista occitana e non pas occitanista. Que sufeish de’n leguir eras orientacions tà n’aver era pròva, per exemple com un grop exagonau qu’ei tàra diversitat lingüistica mes qu’ei mut suths « drets linguistics deth pòple occitan ». E per çò qui deths drets politics que sòn estremats tà deishar plaça aras refòrmas deth Estat. Lavetz on ei era mira estrategica d’independéncia deth P.N.O. qui ei arreivindicada despuish era fondacion? En aqueth ahèr eths principis fondators e fondamentaus non valen pas mes arren. En politica que i a d’arrapà’s aths principis.

En un comunicat deth 15 de mai dera « Federacion provençala dau Partit Occitan, », que’s pòt leguir ua carga contra Melenchon. Que i a de nombrosas criticas e de nombrós motius d’arreget d’aqueth candidat. Totun era critica deth P.O.C. que s’arreduseish ath paracadudatge sonque. B’ei leugèr com critica politica! Completament d’acòrd de díser : « Marselha que s’amerita miélher qu’ua operacion aeroportada shens lendoman ». Per segur, eth miélher que poderé èster un (ua) militant (a) occitanista vertadèr(a), capable(a) de deféner er’occitanitat de Marselha e eths drets economics, sociaus, politics, culturaus e linguïstics deths abitants d’aquera ciutat tant bèra e tròp sovent caricaturada. Lavetz, qu’ei perpausat,  tà hèr puishèu a Melenchon, non pas un (a) candidat (a) atau, mes « de portar eths sufragis sura candidatura deth deputat sortent : Patrick Menucci »,  membre e notable deth P.S. Aqueth partit dab tots eths sués deputats, pendent 5 annadas que desvelopèn eth nacionalisme francés, qu’aprofieitèn deths atentats tà demandar d’amuishar bandèras tricolòras, tà hèr cantar « La Marseillaise », tà’ns hartar der « unitat dera nacion francesa », tot parièr com Melenchon. Arredusir era diferéncia enter aqueths dus candidats partisans der’imperialisme francés sonque sus « operacion aeroportada », que’m pareish d’un praubèr politic importent e guaire occitanista. Athèu tanben qu’am ua manca evidenta de principis ideologics e politics qui herén tan necèra ar’occitanisme politic.

Ara un petit torn suras professions de fe coneishudas, que confirma aqueth espiar critic. Ua sintèsi deras professions de fe deths candidats sostenguts peth P.O.C. que hè aparéisher trèits comuns. En prumèr de notar er’abséncia complèta d’Occitània. Tàd aqueths candidats n’existeish pas brica, era lenga occitana qu’apareish, mes non pas com ua arreivindicacion fondamentau dera nosta identitat e deth combat noste, era sua situacion n’ei pas explicada, n’i a pas nada arreferéncia ar’istòria e ara politica hastiau deths poders francés. Qu’am de candidats de Dordonha, de Biarn, de Vaucluse qui’s semblan a de candidats de departaments francés e non pas d’Occitània.

En Biarn que seré de deishar ua plaça publica ara lenga occitana shens díser arren der’ensenhament a tot nivèu, en Vaucluse que seré de favorisar era diversitat culturau, en Dordonha era cultura mes qu’era lenga,  que serviré ara promocion economica e toristica. Lavetz pas de pòple occitan, pas de pòple istoricament constituit.

De notar tanben que n’i a pas de tèxte en occitan. Tot qu’ei en francés. Quan se parla de visibilitat dera lenga, n’ei pas pres eth parat de l’amuishar ena ua profession de fe qui entra en tots eths ostaus e qui pòt èster leguida per monde qui non legueishen pas un jornau o un libe. Qu’averén atau un parat de descobrir un indici fondamentau deth passat, e dera sua identitat com pòple.

Per contre eth chepic màger qu’ei eras refòrmas deth Estat , era democracia locau, eths servicis publics, eth estatut deths esleguits, …

« Euròpa (n’ei pas dit Union Europèa) non fonciona pas democraticament… » Que pensi n’ei pas aquerò eth problèma. Er’Union Europèa qu’ei per natura non democratica e non pas per foncionament sonque. Que serveish eras fòrças imperialistas europèas e qu’ei er’interfàcia der’integracion ath mercat imperialista mondiau, com era Banca europèa que serveish eths poders financièrs.

« Ester deputat de Biarn qu’ei aver ua vision locau e ua vision globau. » Mes era vision globau qu’ei estatau francesa e union europèa Com dit abans, n’ei pas ua vision globau d’Occitània.

Eth chepic d’aqueths candidats qu’ei sovent hèra ua vision d’esleguit locau. Totun un  deputat qu’ei tanben « Esleguit tàd arrepresentar era Nacion, eth deputat que participa ar’exercici dera sobiranitat nacionau. Que vòta era lei e que contaròtle er’accion deth Governament … » (Fica de sintèsi n° 16 – Assemblée Nationale en linha). Aqueth ròtle n’ei pas evocat brica. Quina posicion ath par dera politica « nacionau » e internacionau de Macron. N’i a pas arren a perpaus dera politica internacionau imperialista e neocolonialista, er’intervencionisme en Africa, eras ventas d’armas, eths bombardaments en Irac, Siria, Libia, … Macron n’a pas deishat aquera politica. Ath contra qu’assolida eth ròtle der’armada francesa. Ester deputat qu’ei préner posicions sus tot aquerò. Que seré era posicion d’un deputat sostengut peth P.O.C?

Que vegem athèu eths efèits d’ua politica francesa, reformista e regionalista. Occitània n’existeish pas, era nacion com eth pople occitans tanpòc, desconeguts eths drets nacionaus e sociaus deth pople noste… Desconegut eth combat tàra consciéncia nacionau e sociau. Eths occitans que sòn arredusits a de ciutadans francés shens nacionalitat occitana.

Lavetz, perqué participar e quitament votar tà candidats qui auhereishen proposicions qui’s semblan tant aras proposicions deths ecologistas francés e deras « esquèrras » francesas. Perqué votar tà copia quan originau a mes de poders e de mejans tà hèr tot parièr?

Alan Sibé

 

 

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s