Macron que ns’auhereish guèrras

Autanlèu eth 19 de mai , mensh d’ua setmana sonque après  era presa de foncion de president, Macron qu’anè per Mali tàd afirmar er’engatjament militari der’imperialisme francés, engatjament en Africa tà perseguir era politica dera « França-Africa », com           er’ engatjament militari contra terrorisme per Sahel e peth mond.  Ara mes de 4000 sordats que son engatjats directament per Africa en basas militàrias  en Mali, Burquina Faso, Mauritània, Nigèr, Chad. Er’armada qu’ei presenta dab « especialistas » en Libia e que participa aths bombardaments en Irac. Que s’i pòt ajustar eth comèrci deras armas, era hornida de « conselhèrs militaris ». Er’armada francesa qu’ei donc tanben un poder economic, politic e ideologic.

Era democracia prometuda contra extrèma dreta qu’apareish ena sua realitat vertadèra. Era rapiditat  d’aquera visita que testimònia der’importància der’engatjament militari ena politica estrangèra e’na politica francesa. De notar era nominacion de Le Drian, ancian cap deras armadas, com ministre deths ahèrs estrangèrs. Un signe deths maishants per çò qui ei dera diplomacia futura,  ostile quitament, guaire abile,  enviat tàths pòples, un signe d’ua politica guaira aplomada tà perméter encontres, comprenença e discutas dab volentat d’apatzar eras relacions e hèr tà patz.

Macron que’s declarè intractable ena luta contra terrorisme. Qu’a causit ua luta dab fòrça, intervencions militàrias, bombardaments, tot çò qui entraina tensions e sentiments de mesprètz, frustracions, malícia… Ara qu’at podem díser per experiéncia, e pr’amor dera natura deth terrorisme, era situacion que ns’envita ara prudéncia ena aquera luta militària. N’ei pas guèrra qui serà era solucion. Aquesta n’a pas amuishat guaire d’eficacitat grana per Afganistan, Libía, Irac, … Aqueth terrorisme que putsa en intervencionisme imperialista com en vueit ideologic e politic deishat peths nacionalismes e socialismes arabs, arrasons e arguments d’arresisténcia e d’ofensiva de cap aths Estats imperialistas.

Lavetz Macron que’s presenta en seguida de Hollande com cap de guèrra  Qu’envita a un engatjament mes importent deths Estats europèus, en arrecercar ua generalisacion deths combats. Plan segur, que pensa perseguir eth Estat d’urgéncia ath contra deras promessas electoraus. Er’analisi deth terrorisme, deth djihadisme qu’ei faussa e que determina ua politica de guèrra.

En díser er’esfòrç militari qu’ei eth mielhor antidòt ath desvelopament deth terrorisme islamista qu’engatja per longtemps eth Estat francés ena guèrra non declarada, que’u hica ath costat der’imperialisme american e’ras suas aventuras. Er’ideologia, eras concepcions deth mond com deras relacions internacionaus que son parièras. Que’s parlan tant « deras valors de França », peths pòples arabs que’s semblan ar’ingeréncia e aras bombas, aras basas militàrias e aras pressions politicas. Ara que’s pòt aténer bèthlèu a un alinhament ath costat deths gavidaires reaccionaris israelians.

Mes inquietant encara en aqueth ahèr qu’ei era plaça auhèrta aras fòrças armadas francesas. Quan Macron e ditz:  » Peras « fòrças vivas  » dera nacion, qu’èi volgut dar eth reng prumèr aras fòrças armadas ». Qué significa aquera promocion der’armada? Tot d’un còp qu’aucuparé ua plaça navèra ena politica interiora com exteriora? Quina influéncia en eths decís e causidas politics?

Perlongament deth Estat d’urgéncia, anóncia der’emplec mes que james dera fòrça militària ena luta antiterrorista, preséncia assegurada per Africa, nominacion der’ancian cap deras armadas com cap dera diplomacia, hicada en davant der’armada, … Macron qu’auhereish aths pòples dependents deth Estat francés guèrras ara plaça deth benestar e dera democracia.

Er’occitanisme politic e totas eras fòrças qui’s vòlen emancipaderas qu’averàn d’arbajar e de chepicà’s deras evolucions futuras e dera politica engatjada. D’arrasons d’arresisténcia, de luta democratica e internacionalista qu’averàn d’èster pausadas. Eths candidats occitanistas aras eleccions legislativas qu’an de s’i hèr de tira.

Alan Sibé

 

 

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s