Campanha de platituds en conformitat dab eth òrdi establit.

A mensh de ueit dias deras eleccions legislativas deth Estat francés qu’am era possibilitat de conéisher eras professions de fe deths candidats. Ar’evidéncia tots que son en arrespècte deras convenéncias politicas, er’adesion ar’ideologica e ara politica dominantas. N’i a pas ua candidatura capabla de honhar e d’arregetar eth òrdi establit. Era practica deth « copiat pegat » qu’ei generalisada tant que’s semblen totas aqueras professions de fe. N’i a pas guaire d’innovacion, d’ideas originaus, capablas d’orbir ua via entàd un aute possible. Era societat, en contengut com ena sua fòrma, qu’ei finaument acceptada. Darrèr quasi totas eras candidaturas que poderé i aver un Macron shens nat problèma. Per segur n’i a pas arren de revolucionari.

Cada candidat que’s posiciona abans tot com un futur esleguit locau, tà resòlver questions locaus. N’an pas guaire consciéncia qu’un deputat qu’ei eth poder « nacionau », qu’ei eth poder legislatiu qui a de contarotlar eth poder executiu, qui a de votar per exemple eth Estat d’urgéncia, de votar eth budget, de votar era guèrra, ecà… Lavetz era filosofia politica, qu’ei a díser era concepcion deth monde e dera societat nosta n’apareish pas en aquestas candidaturas. Que sabem que vòlen hèr tàth territòri e tàths poblans d’eleccion. Mes non sabem pas clarament era sua concepcion deth « Poder ». E seràn capables de parlar hòrt contra eth poder quan hàcia necèra? E seràn godilhòts o pas?

Era politica internacionau qu’ei absenta tanben, qu’ei arredusida a « Euròpa ». Eras intervencions der’armada francesa peth monde non son pas evocadas, era « França Africa  »  tanpòc, eras ventas d’armas, eras intervencions e bombardaments encara mensh. E totun un deputat qu’a de’s prononciar en aqueths ahèrs. Que significa que son tots d’acòrds tàd aquera politica imperialista qui aucupa ua plaça importenta dera politica generau. Que s’en desinterèssan.

Totas eras mesuras sociaus que son desseparadas deth sistèma capitalo-imperialista. Que deishan pensar dab quauquas ideas e drin d’iniciativa e de volentat tot que posca acomodà’s. Qu’ei tota er’illusion reformista.

E’ths nostes occitanistas? Non se demarcan pas brica d’aqueth ensem. Madeishas posicions ath par d' »Euròpa » ( en hèit Union Europèa – mes n’ei pas james precisat), madeishas posicions sociaus, madeishs reformisme e arrespècte deth òrdi establit, madeish silenci ath par dera politica internacionau.

E çò de sordeish, madeish silenci per çò qui ei d’Occitània. Qu’èra possible d’esperar ua demarcacion per un « posicionament globau » per Occitània e un explic d’arreivindicacions occitanistas. Arren! E que mes n’i a pas nada visibilitat dera lenga e dera bandèra occitanas.

Er’esperit com er’espiar critics que son absents. Finaument tot que pòt anar plan, Eths candidats que deishan pensar quauquas refòrmas deth poder francés, deth foncionament deras institucions, dab un estatut der’esleguit, que sian acceptables,

Per contra, era lenga nosta qu’averé d' »aucupar ua plaça ena vita publica » (quina plaça?), o tà desvelopar er’economia toristica…N’ei pas guaire occitanista tot aquerò e que s’ameritaré desvelopaments.

Que mes a travèrs aquestas professions de fe eth pòple noste n’existeish pas, n’ei pas nomentat. Non pòt pas estar remplaçat per un « nosauts » anonime o pera « nosta cultura ». Era critica deth « centralisme » n’ei pas pro tanpòc tà nomentar e criticar un poder qui ei mes qu’aquerò. Enfin que i a tanben de despassar era sola « Région Occitanie » e tornar dar a Occitània era sua pagèra nacionau e istoricament constituida.

D’eleccions deras quaus n’esperam pas arren qu’an d’estar eth parat de’s destriar, d’amuishar era diferéncia vertadèra enter candidats occitans ideologicament e politicament francés e candidats occitans e occitanistas.

Alan Sibé

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s