2023, eth mond qu’a cambiat ja
Era annada de 2023 qu’ei estada annada de combats violents e crudèus, d’acaraments politics deths importents. Eths conflictes dangerόs tà seguretat collectiva que son estats nombrόs, que pòden encara devénguer guèrras regionaus e lhèu sordeish, pr’amor que’s parla quitament d’armas nucleàrias. Que i a tuadèras de civius dab bombardaments hastiaus. Er occident que s’i pèrd tota credibilitat. Tot aquerò qu’amuisha un mond destimborlat.
Que hè necèra d’i véier clar en hèr contra en prumèr era propaganda de hauta intensitat d’ua premsa ath comand der imperialisme occidentau. Qu’espandeish inquietud, paur, desespèr, embrolh e desperduda. Lavetz eras arreacions emocionaus n’an pas de préner era plaça d’un espiar deths hèits, deras politicas entinoadas, deras estrategias militaras, deras ingeréncias de totas, deths interés economics e financièrs.
Mes non cau pas pèrder de vista tanpòc quin eras opressions e arrepressions tan tarriblas e ns’auhereishen tot d’un temps un beròi exemple d’un moviment istoric mondiau d’arresisténcias anti-imperialistas. Qu’ei en trin de cambiar eth mond en acabar era egemonia atlantista, americana, britanica, europèa, israeliana.
Eths signes prumèrs que’ns hèn brembar era luta e era victòria deth pòble vietnamian. Shens tornar tròp luènh tanben que i a de gardà’s ath cap eth partir deths Americans, Alemans, Britanics, Australians e Francés d’Afganistan en aost de 2021. Que son imatges d’imperialistas en desrontada, hicats entà dehòra per combatants en espartenhas e kalachnikov. Que i a d’i ajustar era mauescaduda deras ingeréncias tà entinoar « arrevolucions de colors » per Siria, Georgia, Serbia..
En seguida, mès a un nivèu mes eslhevat, era annada de 2023 qu’ei mercada pera des.hèita dera amassada imperialista occidentau OTAN, sia Estats Units d’America, Grana Bretanha, Union Europèa.
Mentre que n’èi pas acabada era Operacion militara especiau de Russia per Ucraïna que gesseish dab ua intensitat hòrta un aut acarament militar en Palestina aucupada. Atau er imperialisme american qu’ei tumat de pertot e en particular ath punt sensible, Israèl.
Mes que james er imperialisme occidentau qu’ei arregetat per ua màger partida deth mond. Poders e pòbles que n’an hartèra dera politica d’ingeréncias, « arrevolucions de colors », sancions financièras, pressions politicas, assassinats dera CIA e deth Mossad, allianças hastiaus dab neonazis e terroristas islamistas e tot çò qui hè puishèu a desvolopament e patz Eths pòbles que cèrcan d’autas arrelacions internacionaus en arrespècte de causidas politicas e desvolopaments pròpis, d’identitats lingüisticas e culturaus, d’istòrias, tradicions, religions. Uei era question nacionau qu’ei tostemps e encara ua question politica fondamentau. Qu’ei ua question universau vertaderament. D’ara enlà sobiranetat qu’ei era arreivindicacion antí-imperialista màger.
Mentre que nombrόs Estats e pòbles s’esluenhen deth camp occidentau, eras esquèrras qu’an dificultats tà préner posicions antí-imperialistas e antiguèrras. Com tostemps sociau-democracias que son alinhadas en tot amuishar encara que son partida tota der imperialisme.
Er occitanisme politic que devore engatjà’s tot sancèr en sosten d’aqueths combats. Que i a un interés gran d’apregondir era crisi deths imperialismes francés, espanhòu, italian, europèu e american qui’ns mestrèjan.
Malurosament er occitanisme que s’ei alinhat e que sosten eth sué opressor. Que segueish capbaishat çò de demandat peth mèste imperialista e sionista. Atau non caleré pas sosténguer Russia contra imperialisme occidentau e neonazisme pr’amor de Potin. Donbáss qu’ei desconeishut quan combat tàra sua lenga e cultura russas. Era agredida otaniana venguda de luènh qu’ei desbrembada. Non caleré pas sosténguer tanpòc eth pòble palestinian pr’amor deth Hamas. Argument qui permet de desconéisher eth colonialisme israelian e eth sionisme com era arresisténcia palestiniana quitament marxista. Er occitanisme politic qu’a integrat era propaganda imperialista occidentau e sionista. Qu’ei devengut un petit telegrafista dera CIA e deth Mossad.
Era crisi der imperialisme occidentau que hè créisher era preséncia e dominacion americana sus era Union Europèa. Nombrosas basas americanas en Itàlia, en Alemanha e ara peth nord d’Euròpa que contaròtlan tot aqueth espaci europenc dab militars, escotas e servicis secrets. Que i a d’arreperar que i avό augan per Estat francés e Occitània manòbras militaras atlantistas. Qu’anόncian conflictes a vénguer. Que i a d’avisà’s viste viste se non volem pas estar embarcats dens guèrras qui non son pas nostas e se non volem pas servir de carn a canons.
Uei er exemple que ven d’Africa, eths pòbles que son engatjats ena emancipacion, quauques uns qu’an hicat entà dehòra ja eth colonialisme francés. Que venen exemples tanben d’America de Sud, d’Orient, d’Asia, que’s multiplican arrelacions navèras d’escambis e cooperacion com eths BRICS, ecà…
N’i a pas de demorar a despart d’aqueth moviment istoric, en tot saber qu’èm ath còr der imperialisme occidentau. En 2024 qu’averam de tornar soscar eth combat noste en tot hèr compte deth mond qui a cambiat ja.
ARTIGALADAS 