Eleccions tàd assolidar er’imperialisme francés

Que s’apressan hèra eras granas ceremonias supausadas democraticas der’imperialisme francés. Eth rituau tradicionau electorau, presidenciau o legislatiu, que serveish tàd assolidar era dominacion dera borgesia francesa. Tots eths candidats ar’eleccion presidenciau que sòn instruments d’aquera classa. Shens hicar tot eras fòrças ena madeisha saca, totas que defenen totun ua linha ideologica e politica, imperialista  e nacionalista: negacion deth caractèr multinacionau deth Estat francés, negacion deths drets lingüistics, culturaus e politics fondamentaus deras nacions dependentas e coloniaus, lavetz dera nacion occitana, neo-colonialisme e imperialisme en dehòra deth Estat francés.

Com james qu’am ua paleta der’auhèrta politica defensaira d’aqueth poder mestrejant e oprimidor: extrèma-dreta fascista, dreta nacionalista francesa, dreta catolica integrista, sociau-democracia, fauç comunistas, trotsquistas, que n’i a tà hèra de mond. Mes aquera situacion qui’s sembla a diversitat democratica qu’ei sustot simptòma d’ua crisi politica e ideologica deras pregondas. Dab aquer’auhèrta que s’ageish abans tot d’espandir illusions e d’arrecaptar un maximom de gents en trin d’escapar mes anar mes ar’influéncia e dominacion borgesas. Era manòbra darrèra, après ua politica qui a hèit eth lheit deth fascisme , qu’ei de cridar ath lop, de hèr vàder paur tà’s presentar com sola murralha contra er’extrèma-dreta. Era sociau-democracia que desira eth FN ath segond torn tà poder jogar aqueth scenari, arrecaptar eths paurucs e oportunistas e assegurà’s ua navèra eleccion. Que i a de trencar aqueth cerc viciós.

Era manca de fòrças politicas vertaderament opausadas ar’imperialista francés e er' »arreget politic », que hèn vàder un posicionament ath marge dera vita politica e quitament en dehòra deth « quadre » de dominacion imperialista. Qu’apareish mes anar mes, ena situacion de uei, com ua deras responsas politicas de rompedura e ofensiva, mes hòrt qu’abstencion, qu’ei er’arrefús de votacion. Qu’averé d’estar era posicion occitanista.

E totun! Que’s hèn enténer eths occitanistas non pas tà contestar mes tà participar ad aquesta missa. Er’alienacion occitanista que gesseish atau a cada eleccion,  er' »esperit republican francés » que boha per occitanisme e qu’entraina candidats ad aqueth jòc deras illusions. Que’n sòn com eishavanits. Viste hèit que sautan atau shens guaira de reflexion en eth combat politic francés.

Encara e com tostemps eths occitanistas que s’arrèstan sus aqueras petitas frasas e que s’engatjan tà sosténguer un candidat vist tot d’un còp com un « progressista », un « democrata » qui « compren », qui ei « ar’escota », « atentiu », « ubèrt », ara nosta causa. Eths occitanistas n’an pas de memòria! O quauques uns qu’an un plaser masoquista de’s hèr colhonar. Lhèu que cèrcan tanben pretèxtes tà desculpabilizà’s ena votacion tàd « esquèrra » harta de banderas tricolòras e de « La Marseillaise ».   En aqueths moments que’s pòt demandar qu’ei eth combat deths occitanistas? Que lutan tà qué? Tà promessas? Tà ua petita plaça tàra nosta lenga?

Era luta contra er’imperialisme francés e tàra causa occitanista de libertat e d’emancipacion n’a pas d’èster estremada pr’amor de petitas frasas e de promessas. Qu’am de l’aver tostemps ath cap, qu’am de s’i arrapar. Pro! Arrefusem de votar!

Alan SIBE

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s