UA ROMPEDURA EN TRIN DE VÀDER ?

Qu’ei en contèxte de crisi ideologica e de desrontada politica de tots aqueths intellectuaus e politicians qui’s disen d’esquèrra, de progrès o quitament revolucionaris, qu’am de presar eths posicionaments com eth libe « Crépuscule » (1) de Juan Branco. Er autor que s’ei installat sus aqueth terrenh deras ideas e dera accion deishat. Qu’apareish drin solet per aqueth desèrt dera pensada, mes totun que pòrta un alet navèth e sustot qu’anóncia ua possibla rompedura ena politica.

En aqueth libe que ns’amuisha era installacion com eth foncionament deth sistèma de dominacion dera oligarquia francesa, lavetz deth « macronisme » e deths arrepresentants deth poder imperialista francés. Privilègis d’originas de classas, estudis reservats tàra formacion deths quadres der imperialisme e tàd assegurar aqueths privilègis, manòbras de totas, co-optacions, presas de poders, plaça e ròtle de premsa, pressions e exclusions, … qu’ei descripcion d’un poder gahat per ua minoritat qui’s considèra com un eleit mercés a de fortunas bastidas sovent dab era empara der Estat. Qu’ei mitan on senhorèja corrupcion e nepotisme.

Estudiat deth dehens ençà peth Juan Branco vadut d’aqueth mitan e preparat si-madeish tà seguir aquera via tà servir privilègiats, qu’am ací un estudi riale, precís, detalhat, dab eths noms deths actors màgers d’aqueth teatre cinic e hastiau. Nat procès, silenci deths politicians e dera premsa escriuta com audiòvisuau, qu’atèstan dera qualitat d’enquista e d’analisi d’aqueth tribalh.

Totun era contribucion de Juan Branco non déu pas estar arredusida ad aqueth tribalh. Enter era edicion prumèra de « Crépuscule » e era dusau dab ua postfàcia inedita, er autor qu’assegurè de nombrosas conferéncias e que responó a de nombrosas intervistas. Eth mes sovent que tractà deth contengut de « Crépuscule ».   Totun ua entervista que s’amerita ua atencion particulara, era que hasó dab Denis Robert sus « Le Media » (2). Ath parat d’aquera entervista que sortí dera simpla descripcion dera oligarquia tà hè un pas en davant entàra question deth cambiament de sistèma e de çò qui hè hrèita. tàd aquerò.

Qu’ei interessent de s’arrestar sura proposicion de « rompedura ». Que n’emplèga eth tèrmi mes pas solament , que’n balha eths trèits màgers e atau que’ns hè descobrir eth sué pensament. Era « rompedura » qu’ei inevitablament ath par deras concepcions e practicas dera esquèrra sancèra qui demòra tostemps estacada a bastir fronts, allianças d’organizacions, estructuras divèrsas, quan hè hrèita en prumèr d’engatjar reflexion.

Atau tà Juan Branco, en ligason e en tot hèr compte deth moviment deths « Gilets jaunes », qu’ei importent de renovelar era pensada politica. Aquerò qu’ei vertaderament eth cap d’ua rompedura politica, ath contra deths qui pensan « convergéncia deras lutas », « R.I.C. » o encara « procèssus constituant », shens pausar o en esvitar atau vertaderament era question deth poder politic.

Juan Branco qu’exprimeish un pensament politic qui déu neurir eth renovelament dera pensada politic en tot endicar era necèra d’“estar prèst”. (3) Que parla d’”estar prèst” en pensar un basculatge dera situacion politica en Estat francés. Un possible guaire estudiat per ua esquèrra sustot sociau-democrata e revisionista qui non pensa pas revolucion mes gestion deth sistèma imperialista francés.

Eth sué chepic deth poder politic, fondamentau tàd un cambiament politic vertadèr, que l’exprimeish dab er envit a “soscar encara suras estructuras pregondas deth poder”. (4) Hèr compte deras “estructuras pregondas deth poder”, qu’èi enveja d’at díser, enfin! que s’en va temps que i aja ua apròcha seriosa dera question deth poder politic. Qu’ei prumèr tà poder compréner era dominacion dera borgesia imperialista francesa. Aqueras estructuras que sòn estructuras de dominacion de classa dab era particularitat d’estar tanben estructuras de dominacion nacionau. “Estructuras pregondas” qu’apareishen a travèrs eras nocions de “França Estat-Nacion”, de “Republica ua e indivisibla”, que pausan era existéncia d’ua question nacionau e coloniau per Estat francés qui non déu pas estar desconeishuda. Aquera apròcha que déu constituir ua rompedura ena pensada politica dominanta, un espiar navèth tàd avénguer, tà rómper dab eth nacionalisme francés enradigat ena pensada politica dera esquèrra. Lavetz que pausa tanben un internacionalisme intèrne ar Estat francés.

Juan. Branco que notè, “n’i a pas de solucion institucionau, pas de fòrça en mesura de rómper dab eth sistèma”. (5) Coordinacions, fronts, ecà…, sistèmas d’aparelhs qui assolidan tostemps eras basas ideologicas borgesas, n’an pas de plaça adara. Ath contra que preconizà de “tornar hèr politic”. (6) Qu’envità militants a hèr vàder “grops de reflexion en prumèr e d’accion”. (7) Encara de proposicions de « rompedura » e subertot qu’aconselhè de “préner eth pas de costat”. (8) Ua manèira de sortir deth quadre ideologic e politic, de rómper dab eth sistèma de pensada, de hèr drin d’arrèrpè tàd un espiar  objectiu.

Lavetz Juan Branco, en quauques mots d’entervista que sòn proposicions politicas tà tirar en davant, pr’amor que sòn eth cap d’ua possibla rompedura. En aqueth posicionament que pareish drin solet en mitan deths intellectuaus francés. Aquera evolucion dera pensada politica que’ns pertòca directament a nosauts occitanistas. Qu’èm en ua situacion ideologica e politica tota parièra. Qu’am d’aver un pensament , eth de  » préner eth pas de costat », de « tornar hèr politic », « de soscar suras estructuras pregondas deth poder  » tàd ”estar prèsts”, tàd acarà’ns a ua situacion ena quau non podórem pas demorar simples espectators. Era actualitat deras lutas deths pòples que’ns l’arrepèra tot dia.

(1) Juan BRANCO, Crépuscule, Editions Au diable vauvert/Massat Editions 2019 Points 2019 pour la postface inédite.                                                                                                 (2) Le Média, https:www.lemediatv.fr/juan-branco-sur-macron-les-gilets-jaunes-crepuscule-assange/       (3)  idem.                                                                                                                                (4) idem.                                                                                                                     (5)idem.                                                                                                                                    (6)idem.                                                                                                                                    (7) idem.                                                                                                                           (8)idem.                                                                                                                                   

————–

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s