Dus occitanismes inconciliables

Dab eth ahèr de Vistedit qu’èra evident dijà, que’s dessenhava dus occitanismes politics. Dab era susmauta populara de « gilets gròcs » qu’ei confirmada aquera situacion politica. Que i avó visiblas bandèras occitanas sus virolets e video deras beròias ath parat dera manifestacion liceana de Tolosa. Aqueths occcitanistas non s’estujan pas e non sòn pas de paurucs, simbèu atau d’un occitanisme navèth. Que’s pòt desirar d’imatges tots parièrs per Occitània sancèra. Que’s pòt pensar tanben er’ODPO n’èra pas completament estrangèra ad aquera preséncia occitanista suth parçan tolosan, sustot qu’ei eth sol grop politic occitanista a préner posicion clara dab subertot ua crida aths occitanistas.

Eth « culturalisme » qui mestrèja despuish annadas e annadas qu’ei un aute còp de mes en trin de produsir efèits tarribles en hèr deth moviment occitanista un moviment « felibre », shens nat poder, incapable, qui non sèrv pas entàd arren. Era copadura dab eth pòple noste qu’ei complèta. Eth POC, eth PNO, Libertat e de nombrós militants occitanistas, tots embarrats en « culturalisme », ena defensa unica d’ua lenga occitana en dehòra dera societat e deth pòple noste, que viven en ua boheta d’un monde borgés e petit-borgés. Que desconeishen eth pòple noste, e quitament eth pòple tot simplament, eras suas condicions de vita e de tribalh. Atau aqueths occitanistas que demòran a despart d’ua susmauta istorica qui truca objectivament eth poder imperialista francés e europèu, eth poder financièr, en tot arregetar eras condicions de vita impausadas despuish mes d’ua annada. Eth pretèxte qu’ei era preséncia de militants d’extrèma-dreta, de monde dab concepcions racistas e sexistas, ecà… Mes eth pòple qu’ei atau, divèrs, qu’ei pr’amor d’aquerò que i a d’i estar present tà miar era luta ideologica e politica ath dehens. Atau qu’ei revolucion.

Era question fondamentau n’ei pas eras compausantas ideologicas e politicas divèrsas peths pòples mes er’incapacitat ideologica e politica der’occitanisme d’intervénguer e de perpausar ua alternativa politica. Eths dangèrs que sòn grans d’un poder reaccionari hèra ath darrèr d’aqueths eveniments. Era causa non serà pas eths pòples mes era manca d’alternativa politica progressista o quitament revolucionària.

Er’occitanisme politic qu’amuisha un feblèr poilitic deths grans mes tanben de posicionaments de classa, borgés, petits borgés, conservators, sociau-democratas, reaccionaris. Qu’apareishen fin finala defensaires deth òrdi establit.

Qu’ei arribat eth moment de vertat. Un corrent politic occitanista eretèr deth monde vielh qu’ei en trin de morí’s, vadut deras tèsis sociau-democratas, regionalistas, culturalistas qui serveishen er’imperialisme francés  vadudas de R. Lafont, F-M Castan, e F. Fontan. Dijà que i avó eths moments hòrts deth procèssus d’autodeterminacion de Catalonha-Aran. Aqueth corrent qu’arregetè tota manifestacion grana de sosten tàd acontentà’s de petitas amassadas shens guaire de visibilitat, mentre que de pòples manifestavan ar’entorn d’Occitània. Qu’arrefusèn de miar un explic politic e de conscientizacion deth pòple noste ar’entorn deras questions politicas fondamentaus d’autodeterminacion, de dret de decidir e d’aproprià’s eth pais com eth noste avénguer. Pas de solidaritat tanpòc entàths presoèrs politics. Com se Catalonha-Aran èran parçans e pòples luenhècs e quasi desconeishuts. Que mes Aran qu’ei partida dera nacion occitana e tà nombrós occitanistas qu’ei encara com parçan estrangèr.

Puish que i avó eth ahèr de Vistedit escanat shens nada vergonha dab eth silenci e era passivitat complicis d’ua partida gran der’occitanisme. Ara que i a era susmauta populara deths gilets gròcs. Lavetz un aut còp de mes eth moviment politic occitanista qu’ei absent, n’a pas arren a díser, qu’ei incapable d’exprimí’s, de perpausar ua alternativa politica occitanista ad aquera crisi deth poder imperialista francés.

Non pòt pas durar hèra, un aut occitanisme qu’a de vàder, patriotic, revolucionari, popular. Aqueth que vaderà en desseparà’s de manèira radicau e contra aqueth occitanisme vielhàs qui hè puishèu. Nada negociacion possibla, nat compromés possible, Era rompedura qu’a d’estar entinoada de tira.

Com l’escrivó Lenin, tàd amassà’s que i a de destrià’s en prumèr. Lavetz que i a de pausar tots eths elements d’ua linha politica navèra, tot qu’a d’estar clar, e totom qu’averà de préner partit. Ara era luta ideologica e politica ath dehens der’occitanisme qu’a d’estar prumèra tàd ua rompedura clara e vertadèra.

Qu’averàn d’amassà’s tots eths qui volen desseparà’s d’aqueth corrent politic completament despassat, ar’entorn d’ua linha politica de luta deth pople occitan tàths sués drets nacionaus e sociaus, tà hèr eth pople noste que prenga en man aqueth combat, tà que non sia pas mes eth ahèr de petits notables carrieristas qui s’acontentan dera societat actuau.

Eths camps que’s van dessenhar drin a drin. Dijà er’ODPO que’s destria, mes per segur de nombrós militants inorganizats o non que van aparéisher en arrecèrca d’un contengut e d’ua via occitanistas diferents. Que i averà de discutir, de treitiar eth terrenh ideologic e politic amassa, non pas en discutas e negociacions dab er’occitanisme vielh e qui n’a pas mes de plaça. Qu’am de guerdar e pensar un orizont navèth, era luta nacionau e sociau.

Alan Sibé

 

 

 

One thought on “Dus occitanismes inconciliables

  1. Baptiste ditz :

    Adishatz, dilheu que s’em mancat sus los baratges du costat de Pau, qu’em demandi on ei anat l’autor entà har aqueth espiar sus lo manca d’occitanistas dab los gilets jaunes ? Sus lo peatge de Pau, los passa carreras deus dissaptes, las actions a la maria, qu’ei tostem vist los drapèus occitans, dab los occitanistas enta’us tiener e los defender!

    Like

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s