Eth prètz dera dependéncia

Com ua partida màger deth monde associatiu, educatiu, culturau, eth moviment occitanista qu’a bastit era sua activitat suths « emplecs ajudats ».  Aqueths tipes d’emplecs qui son de subvencions d’Estat indirèctas, com eras subvencions dirèctas d’Estat, deras regions e despartaments, o encara de prèsts de locaus, que son devenguts tot d’un còp elements essenciaus e indispensables der’activitat associativa occitanista. Qu’ei tot un ensem d’ajudas shens nat dobte mes qui n’ei pas totun shens efèits pervèrs e mortaus en tot hèr vàder dependéncia e baishada deth militantisme actiu.

Per segur associacions occitanistas joenas, fragilas, shens guaire d’empara populara, que son en’obligacion tà vàder e contunhar de’s desvelopar, d’entrar en aqueth sistèma. Aqueth qu’estó creat peth Estat tà perméter a gents d’aver ua experiéncia professionau prumèra, tà hèr baishar era pression deth caumaire, tà desamorsar de possiblas susmautas sociaus, en tot espleitar ua man d’òbra dab salaris baishs e shens nada cotiza ar’arretirada.

N’ei pas ací era volentat de criticar er’oportunitat gahada peth moviment occitanista associatiu qui n’aprofieita tàd un cèrt desvelopament. Mes uei que devem presar tota era fragilitat d’aqueth desvelopament pr’amor dera dependéncia ara sola bona volentat o non deras autoritats politicas francesas d’ajudar e tot d’un temps d’impausar limitas ath desvelopament com aras iniciativas associativas e militantas. Ua autolimitacion mes dangerosa encara qu’apareish vertaderament, pr’amor deras subvencions demandadas e esperadas. Aqueth efèit paralisant qu’averà consequéncias desastrosas en tèrmis de desmobilisacion militanta.

Ua reaccion que s’impausa viste hèit de cara ara politica deth governament e de Macron qui ven de decidir d’arredusir eths « emplecs ajudats ». Dijà que’s parla en eth Jornalet deth dimars 5 de seteme,  dera precarizacion dera Calandreta deth Lis. Que’s parla de situacion desesperanta e de risca de desapareishuda. Mes era còla dera Calandreta que’s viraré deth costat deth Prefècte deth despartament. Totun que i a de saber eth Prefècte qu’arrepresenta Macron en despartament. Que i a de pensar donc que’n calerà drin mes tàd enversar aquera situacion.

Era desmobilisazion militanta pr’amor d’ua politica abituau de subvencions pensadas d’ara enlà com dret, que risca d’èster un danger màger tàr’avénguer de tot eth moviment Calandreta. Que i a d’aver paur era Calandreta deth Lis non sia pas qu’un signe prumèr d’ua ataca d’ua pagèra grana contra er’ensenhament immersiu dera lenga occitana.

Eth temps deras mobilisacions de sosten e deth militantisme actiu qu’ei en trin de tornar com ua necèra grana. Que seré plan qu’i pensèssem viste viste tàd organisà’s per Occitània sancèra. Eths nombrós « avis favorable » de Macron ath questionari deths ensenhaires occitans deth public que prenen un sens particular, oportunista e electoralista, ath par d’aqueths decís qui atacan endirectament er’ensenhament dera lenga occitana a travèrs eths mejans materiaus. Eth resultat que poderé èster tarrible shens era nosta ripòsta. Eth prètz dera dependéncia que’s pagaré car hèra.

Alan Sibé

 

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s