Solidaritat !

Aras pòrtas d’Occitània que’s jòga un moment importent, màger e grèu, der’istòria de Catalonha e Aran, mes tanben d’ua cèrta faiçon d’Occitània sancèra, Vascoat, Pais Valencian, Isclas Balears, Aragon, Corsèga, Sardenha, deth Estat espanhòu tanben, der’istòria deth sud d’Euròpa, de Mediterranèu, … Ua inversion istorica que’s pòt seriosament produsir eth 1èr d’Octobre. Per segur, peth prumèr còp despuish sègles, despuish en tot cas eth passatge ath capitalisme qui hasó vàder Estats- Nacions e sustot Estats multinacionaus, per aqueth parçan, un Estat navèth que pòt e que déu vàder. Com s’at podèva pensar, que serà un Estat d’ua nacion embarrada en un Estat abans que’s sia poduda crear un Estat nacionau. Qu’ei ua trencada ideologica e politica plea de promessas e d’ensenhaments.

Com at digó Arnaldo Otegi en un entervista a Vilaweb (27.01.17) :  » Que i a gents qui disen independentisme catalan qu’a aprés hèra deth basco. Jo creii qu’èm nosauts qui aprenem hèra deth independentisme catalan. E encara que n’am d’apréner hèra mes de causas. »

Catalonha e Aran  independents que serà un patac deths durs dat ar’imperialisme espanhòu e un avertiment a tots eths nacionalistas e imperialistas europèus com ar’Union Europèa qui an pensat tostemps a ua situacion de dominacion nacionau eternau. Catalonha e Aran independents que serà objectivament ua avançada de democracia e de libertat, ua empara e un exemple tà tots eths pòples.

Era cranhença der’amplor deth patac que’s presa ath par deth silenci deras fòrças politicas europèas e quitament eras d' »esquèrra ». Aqueth procèssus qu’ei tant opausat aras concepcions e posicions politicas enradigadas en aqueras fòrças, qu’ aiman parlar miélher de Podemos qui apareish alavetz com eth guarant deth òrdi establit.

E nosauts occitanistas que hèm dab tot aquerò a quauquas setmanas sonque d’aqueth saut possible? Qu’èm en vacanças, que hestejam, que devisam quan devisam, de lenga, de dialectes, de grafias, d’accent, de noms de familha, deth nom dera « Région Occitanie », … De questions segondàrias, shens nada urgéncia ath par dera question der’independéncia de Catalonha e Aran. Aquesta qu’ei com ua question luenhèca, de Curdistan, Chiapas, Indians de Lacotà, Chetchènes, … Mentre qu’ei a costat e que mes Aran ei era nacion occitana.

Eras solidaritats que’s justifican hèra. Que hèm tà preparà’s e preparar eth pòple noste ara solidaritat entà hrairs e un deths vesins prumèrs? Er’espròva de fòrça qu’ei començada. Qu’ei era temporada de tots eths dangèrs, deras pressions e provocacions deth poder espanhòu, de provocacions e atentats de grops fascistas nostalgics deth franquisme, dera polícia, der’armada. Eras miaças que son claras e nombrosas contra eths arrepresentents esleguits deth pòple catalan. Com at digó encara A. Otegi, « Lhèu que s’obrirà un periòde de transicion mes o mensh long, dab era coexisténcia de duas legalitats e que pòt èster complicat ». Mes que pòt èster sordeish tanben. Que mes eras partviradas economicas e politicas pera peninsula qui seguiràn per segur ua independéncia que poderàn aver efèits per Occitània sancèra.

De conferéncias e discutas sur’independéncia de Catalonha e Aran que serén estadas planvengudas per Occitània. Com tanben documents deths Catalans e Aranés que serén poduts estar arrevirats en occitan e francés tà hèr conéisher era situacion e èster capables de n’explicar eras contradiccions viscudas tot dia, eths enjòcs politics e geopolitics.

N’i a pas que nosauts occitanistas qui poscam assegurar aquera solidaritat. Que prèssa eth temps.

 

 

 

 

 

 

 

 

 

 

 

 

 

 

 

 

 

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s

%d bloggers like this: