Quin tristèr!

Que n’i a atau que’us devem hèr parlar, per segur a un moment tostemps que trebucan e que revèlan er’imatge vertadèr darrèr demagogia e personatge bastit tà sonque carrierisme politic.

Lassalle que n’ei, e viste hèit emportat per resultats deras eleccions darrèras, qu’a deishat càier era careta. Eth « bon sens » deth montanhòu e paísan qu’ei apareishut ena sua realitat vertadèra, era d’un notable reaccionari hèra. Per demagogia que’s ditz de casa, deth monde rurau, de vilatjòt, de Biarn, deth pòple, tot un paraulís tàd embrumar e tà gahar nocients.

Dab çò de dit a perpaus deras Ikastolak, en hèr ua mesclanha enter ensenhament dera lenga vasca e manejament d’armas, qu’ei tot simplament hastiau. Que digó un acús qui n’estó pas james dit peths adversaris der’ensenhament deras lengas nacionaus. Que sap era realitat vertadèra e aqueras paraulas que sòn ua merca d’ua manca d’intelligéncia e d’ua linha ideologica e politica pregondament enradigada, ostila ath pòple vasco e per delà a tots eths pòples deras nacions dependentas e coloniaus, aras arreivindicacions e ath mespretz deths qui hèn tant d’esfòrçs quotidians tà sauvar eras lengas.

Eras desencusas ath pòple vasco non poderàn pas esfaçar ço de dit. A tot james Lassalle qu’a deishat ua merca negativa qui non serà pas desbrembada. Que’s podèva pensar qu’estosse despassar aqueths temps deras caricaturas hastiaus.

Ara qué i a d’aténer d’aqueth? Arren per segur. Totun d’occitanistas nocients que’u sostengón ath parat der’eleccion presidenciau, qu’aperèn a votar tàd eth pr’amor que digó per demagogia quauques mots d’occitan. Qu’ei pòc tà dar hidança, que n’am uei ua pròva. Lassalle qu’ei simplament un notable francés, un carrierista politic e un demagòg,  qui serveish er’imperialisme francés. Qu’am de l’aver tostemps ath cap d’ara enlà.

Ara eths occitanistas e especiaument Calandreta qu’an de’s solidarisar dab Seaska, de denonciar Lassalle qui s’ei desqualificat completament e qu’an de’n tirar ensenhaments abans d’aperar a votar tà notables de noste d’aquera traca.

Alan Sibé

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s