Nacionalisme francés tostemps…

Era victòria electorau de Macron qu’ei hèita. Qu’èra anonciada despuish longtemps com expression deths aròus imperialistas. Sonque eths occitanistas oportunistas e paurucs que podèvan aver paur d’un aut resultat. Era manipulacion orquestrada per Hollande e Valls que foncionè. Macron que va assegurar era continuitat d’ua quinquenat antipopular e reaccionari. Lavetz que i a de preparà’s ar’arresisténcia e ath combat per tots domènis.

Qué i a d’aténer d’aquer’eleccion e d’aqueth president, nosauts occitanistas?  Pas guaire e quitament arren. Qu’ei ua tradicion, eras organisacions qui hèn tàra lenga e cultura occitanas que pausen questions aths candidats. Aqueste còp tanben un questionari qu’estó adreçat. Eth jòc questions-responsas dab Macron qu’ei tot simplament « extraordinari ». Dab un Macron qui ns’a amuishat un posicionament completament embrumat, shens programa definit, shens engatjaments segurs, qu’am un questionament deras federacions e organismes hent tàras lenga e cultura occitanas qui s’acontenta d’ua demanda d’avís « favorable » o pas. Nada demanda d’engatjament sus questions precisas e evaluadas. A qué serveish un questionari atau, que mes dab un Macron?  Un aute còp de mes qu’am de paraulas agradiuas tà nocients e tàd eths qui s’acontentan e se regaudeishen de « comprenenças », d' »avís favorables », d' »escota », ecà, ecà … Après annadas e annadas de paraulas e promessas, n’ei pas pro d' »avís favorables »! Un questionari ideau tà tot notable qui non vòu pas james engatjà’s. Perqué non seré pas « favorable » Macron? N’engatja pas ad arren, non còsta pas arren.

Eth Macron campion d' »Euròpa », dera finança internacionau, der’economia liberau, der’imperialisme, no’n desbromb pas totun un posicionament nacionalista francés. B’ei clar! Com un avertiment, « Oc, ua lei compatibla dab era Constitucion de França e er’unitat deth pòple francés … », mes luenh er’embarrament qu’ei afirmat, « … eras lengas regionaus, lengas de França, lengas dera Republica, qu’averàn era plaça en Centre dera Francofonia… », tres signes d’embarrament, atau  « lengas regionaus » e non nacionaus, « lengas de França » e non d’Occitània, de Corsèga, de Bretanha, ecà…, « lengas dera Republica » com sosmission ath poder politic imperialista e que mes er’embarrament ena francofonia. Aqueras lengas nacionaus que seràn alavetz restacadas ara francofonia, simbèu der’ideologia e politica neocolonialistas. Qu’ei vertaderament continuitat deth nacionalisme e imperialisme francés. De qué chepicà’s encara.

Alan Sibé

 

 

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s