A perpaus de fascisme

Uei, dab eras eleccions presidenciaus que’s parla tot d’un còp de fascisme quan se parlava dentiò adara de populisme. Passar d’ua nocion a ua auta non pausa pas problèma per quauques uns. Que s’amerita totun de caracterisar era nocion de fascisme, emplegada sovent de tòrt e de travèrs, tà miélher compréner era nosta situacion politica e eths dangèrs qui’ns miaçan tàd ua ripòsta adaptada e eficaça.                                           Que’m pareish de bon parat d’arreperar quauquas posicions deth gran militant antí-fascista, eth Jòrdi Dimitrov, d’ua familha de revolucionaris, vadut en 1882 e mort en 1949, comunista e sindicalista bulgari, parlamentari,   gavidaire der’Internacionau, eròi antí-fascista deth procès de Leipzig acarat aths nazis.

Quauques extrèits deth libe: Georges Dimitrov – Oeuvres choisies, Paris, Editions sociales, 1972.

« Eths mitans imperialistas qu’ensajan de hèr arrecàder eth pes sancèr dera crisi suras espatlas deths tribalhadors. Qu’ei tàd aquerò qu’an besonh de fascisme.                            « Que s’i hèn tà resòlver eth problèma deths mercats  per’asserviment deths pòples febles, per’agravacion deth jun coloniau e per un navèth partatge deth mond pera guèrra. Qu’ei tàd aquerò qu’an besonh de fascisme. » (p. 37-38)

« Mes çò de caracteristic tàra victòria de fascisme, qu’ei precisament era circonstància aquera victòria qu’atèsta d’ua part eth feblèr deth proletariat, desorganisat e paralisat pera politica sociau-democrata, scissionista de collaboracion de classa dab era borgesia, e, d’auta part, qu’exprima eth feblèr dera quita borgesia, espaurida de cara ara  realizacion der’unitat de luta dera classa obrèra, espaurida de cara ara revolucion e non pòt pas mes manténguer era dictatura suras massas peths vielhs metòdes de democracia borgesa e de parlamentarisme. » (p.38)

« Eth fascisme, n’ei pas un poder ath dessús deras classas, ni eth poder dera petita borgesia o deths elements desclassats deth proletariat suth capitau financièr. Eth fascisme , qu’ei eth poder deth quite capitau financièr. Qu’ei er’organisacion der’arrepression terrorista contra era classa obrèra e era partida revolucionària dera paisaneria e deths intellectuaus. Eth fascisme en politica exteriora , qu’ei chovinisme eth mes mahutre, en tot cultivar un òdi bestiau contra eths autes pòples. » (p. 39)

« Er’arribada deth fascisme ath poder, n’ei pas era substitucion ordinària d’un governament borgés a un aute, mes eth remplaçament d’ua fòrma estatau dera dominacion de classa dera borgesia – democracia borgesa – per ua auta fòrma d’aquera dominacion, era dictatura terrorista declarada. Desconéisher aquera distincion que seré ua fauta grèva, qui empacharé eth proletariat revolucionari de mobilisar eras mes amplas categorias tribalhadoras dera ciutat com dera campanha tàra luta contra era miaça dera presa de poder peths fascistas, e d’emplegar eras contradiccions deth camp dera quita borgesia. Mes qu’ei ua fauta non mensh grèva e non mensh dangerosa de sosestimar er’importància  qu’an, tàr’instauracion dera dictatura  fascista, eras mesuras reaccionàrias dera borgesia, qui vaden sordeish uei peths país de democracia borgesa, e qui esglachan eras libertats democraticas deths tribalhadors, que faussifican e qu’arretalhan eths drets deth Parlament, qu’ahorteishen arrepression contra eth moviment revolucionari. » (p.40-41)

« Eths caps dera sociau-democracia qu’embrumavan e qu’estujavan aras massas eth caractèr vertadèr de classa deth fascisme, n’aperavan pas ara luta contra eras mesuras reaccionàrias mes a mes hòrtas dera borgesia. Que pòrtan era grana responsabilitat istorica deth hèit qu’ath moment decisiu dera ofensiva fascista, ua partida grana hèra deras massas tribalhadoras, per Alemanha e per tota ua seria d’auts país fascistes, n’arreconescón pas en fascisme eth rapaç financièr sanguinari, er’enemic sordeish, e deth hèit aqueras massas n’estón pas prèstas ara riposta. » (p. 41)

A travèrs aqueths extrèits lhèu que s’i poderà trobar drin d’elements de comprenença mielhora de fascisme. Que s’i arreconeisherà tanben era politica dera borgesia, dera sociau-democracia, deras leis liberticidis e dangerosas de Valls e Hollande, d’un F.N. invitat aras ceremonias oficiaus e ena prensa, assimilat ara extrèma-esquèrra, nomentat « dreta radicau », « dreta patriotica », « dreta nacionalista »,  « populista »,  mes guaire fascista.

Alan Sibé


 

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s